सियोल: उत्तर कोरियाका नेता किम जोङ उनले आफ्नी छोरीसँगै बहु–रकेट प्रक्षेपण प्रणालीको परीक्षण अवलोकन गरेका छन्। यसलाई अमेरिका र दक्षिण कोरियाबीच जारी संयुक्त सैन्य अभ्यासको सम्भावित जवाफका रूपमा हेरिएको छ।
उत्तर कोरियाले यसअघि अमेरिका र दक्षिण कोरियाको संयुक्त सैन्य अभ्यासको प्रतिकार गर्ने चेतावनी दिएको थियो। अहिले दुवै देशबीच ‘फ्रिडम शिल्ड’ नामक संयुक्त सैन्य अभ्यास सञ्चालन भइरहेको छ। उत्तर कोरियाले यस्ता अभ्यासलाई आफूमाथि आक्रमणको तयारीको रूपमा व्याख्या गर्दै आएको छ।
सरकारी कोरियाली केन्द्रीय समाचार एजेन्सीका अनुसार किमले शनिबार उत्तर कोरियाको पूर्वी तट नजिकै ६०० मिलिमिटर क्षमताका १२ वटा उच्च सटीकता भएका रकेट प्रक्षेपण प्रणालीको परीक्षण अवलोकन गरेका थिए।
दक्षिण कोरियाली सेनाले पनि शनिबार उत्तर कोरियाले पूर्वी समुद्रतर्फ करिब १० वटा ब्यालिस्टिक मिसाइल प्रक्षेपण गरेको जनाएको छ। दक्षिण कोरियाको राष्ट्रिय सुरक्षा परिषद्ले यसलाई उक्साहटपूर्ण कदम भन्दै संयुक्त राष्ट्र सुरक्षा परिषद्का प्रस्तावको उल्लंघन भएको बताएको छ, जसले उत्तर कोरियालाई ब्यालिस्टिक गतिविधि गर्न प्रतिबन्ध लगाएको छ।
समाचार एजेन्सीका अनुसार किम जोङ उनले उक्त अभ्यासले ४२० किलोमिटर दूरीभित्र पर्ने शत्रुलाई “चिन्तित” बनाउने र उत्तर कोरियाको सामरिक परमाणु हतियारको विनाशकारी शक्ति बुझ्न बाध्य पार्ने बताएका छन्। उनको संकेत सम्भवतः दक्षिण कोरिया तथा त्यहाँ तैनाथ अमेरिकी सैनिकतर्फ रहेको बताइएको छ।
तस्बिरहरूमा किम जोङ उन आफ्नी छोरी किम जु ए सँग विशाल प्रक्षेपण ट्रक नजिकै हिँड्दै र त्यहाँबाट प्रक्षेपित हतियारहरू अवलोकन गर्दै गरेको देखिएको छ। किम जु ए करिब १३ वर्षकी रहेको बताइन्छ र सन् २०२२ को अन्त्यदेखि नै उनी सैन्य परेड तथा हतियार परीक्षणजस्ता महत्वपूर्ण कार्यक्रममा आफ्ना पितासँग देखिँदै आएकी छन्।
दक्षिण कोरियाको गुप्तचर एजेन्सीले हालै किम जोङ उनले आफ्नी छोरीलाई सम्भावित उत्तराधिकारीका रूपमा अघि सार्ने तयारी गरिरहेका हुन सक्ने अनुमान गरेको थियो।