नयाँ दिल्ली: इजरायलको वायुसेनाले सोमबार राति ढिलो र मंगलबार बिहान सबेरै दक्षिणी तथा पूर्वी लेबनानका विभिन्न क्षेत्रमा हवाई आक्रमण गरेको छ। सोमबार राति करिब एक बजे भएको आक्रमणमा दक्षिणी तटीय सहर सिडोनस्थित तीन तले एक व्यावसायिक भवन पूर्ण रूपमा ध्वस्त भएको छ।
घटनास्थलमा रहेका ‘एसोसिएटेड प्रेस’ (एपी) का एक फोटोग्राफरका अनुसार आक्रमण गरिएको क्षेत्र व्यावसायिक इलाका हो र आक्रमणको समयमा उक्त भवन खाली थियो। आक्रमणपछि कम्तीमा एक जनालाई एम्बुलेन्समार्फत अस्पताल लगिएको छ भने उद्धारकर्मीहरू अन्य व्यक्तिको खोजीका लागि भग्नावशेषको तलासी गरिरहेका थिए। यद्यपि, हालसम्म कुनै मृत्यु भएको पुष्टि भएको छैन।
यी आक्रमणहरू यस्तो समयमा भएका छन्, जब केही दिनभित्रै लेबनानका सेनाप्रमुखले इजरायलसँग जोडिएको सीमावर्ती क्षेत्रमा सक्रिय चरमपन्थी समूह हिज्बुल्लालाई निःशस्त्रीकरण गर्ने आफ्नो अभियानबारे सरकारलाई जानकारी दिने तयारी गरिरहेका छन्।
यसअघि सोमबार इजरायली सेनाले दक्षिणी र पूर्वी लेबनानका विभिन्न ठिकानामा आक्रमण गरेको र ती स्थानहरूमा हिज्बुल्ला तथा प्यालेस्टिनी समूह हमासका संरचनात्मक सुविधा रहेको दाबी गरेको थियो। आक्रमण हुनुभन्दा करिब दुई घण्टा अघि इजरायली सेनाका एक प्रवक्ताले सामाजिक सञ्जाल ‘एक्स’ मार्फत चेतावनी जारी गर्दै पूर्वी बेका उपत्यकाका दुई गाउँ र दक्षिणी लेबनानका अन्य दुई गाउँमा रहेका ठिकानामा आक्रमण गरिने बताएका थिए।
तर सिडोनमा गरिएको आक्रमण कुनै पूर्वसूचना बिना भएको थियो र यसबारे इजरायली सेनाले तत्काल कुनै आधिकारिक प्रतिक्रिया दिएको छैन।