नयाँ दिल्ली: गाजाका अस्पतालहरूले शनिबार भएका इजरायली आक्रमणमा कम्तीमा २९ फिलिस्तीनीको मृत्यु भएको जानकारी दिएका छन्। अक्टोबरमा लागू भएको युद्धविरामयता एकै दिनमा भएको यो सबैभन्दा ठूलो मानवीय क्षतिमध्ये एक हो।
गाजा सिटी, खान युनिसलगायत विभिन्न स्थानमा आक्रमण भएको बताइएको छ। गाजा सिटीमा एउटा आवासीय भवन र प्रहरी चौकीमा आक्रमण गरिएको थियो भने खान युनिसमा रहेको टेन्ट शिविर लक्षित गरिएको थियो। मृतकमध्ये महिला र बालबालिका पनि छन्।
शिफा अस्पतालका निर्देशक मोहम्मद अबु सेल्मियाका अनुसार प्रहरी चौकीमा गरिएको हवाई आक्रमणमा कम्तीमा १४ जनाको मृत्यु भएको छ, जसमा महिला प्रहरी र थुनामा राखिएका व्यक्ति पनि छन्। नासिर अस्पतालले टेन्ट शिविरमा भएको आक्रमणपछि आगलागी हुँदा एउटै परिवारका सात जनाको ज्यान गएको जनाएको छ।
यी आक्रमण मिस्रसँगको राफा सीमा नाका खुल्ने तयारी भइरहेका बेला भएका हुन्। राफा नाकालाई गाजाबाहिर उपचारका लागि जानुपर्ने हजारौं बिरामीका लागि जीवनरेखाका रूपमा लिइन्छ, किनकि युद्धका कारण स्वास्थ्य संरचना ध्वस्त भएको छ।
हमासले यी आक्रमणलाई युद्धविरामको “खुला उल्लङ्घन” भनेको छ र अमेरिका तथा अन्य मध्यस्थ देशहरूलाई इजरायलमाथि दबाब दिन आग्रह गरेको छ। इजरायली सेनाले भने युद्धविराम उल्लङ्घनको प्रतिक्रियास्वरूप आक्रमण गरिएको दाबी गरेको छ।
गाजाको स्वास्थ्य मन्त्रालयका अनुसार १० अक्टोबरदेखि लागू युद्धविरामयता इजरायली आक्रमणमा ५०९ फिलिस्तीनीको मृत्यु भइसकेको छ।