नयाँ दिल्ली: भारतले पूर्वोत्तर क्षेत्रलाई देशको अन्य भागसँग जोड्नका लागि महत्वाकांक्षी रेल सुरङ निर्माण परियोजना अघि बढाएको छ। यस योजनामा “चिकन नेक” (सिलीगुडी कर्डोर) र असमको ब्रह्मपुत्र नदी मुनि सुरङ निर्माण प्रमुख अंशका रूपमा छन्।
चिकन नेक सुरङ परियोजना
भारतका पूर्वोत्तर राज्यहरूलाई मुख्य भूमि भारतसँग जोड्ने सिलीगुडी कर्डोरलाई ‘चिकन नेक’ नामले चिनिन्छ। यस क्षेत्रको ३६ किलोमिटर लामो भूमिगत सुरङ बनाउने योजना अघि बढेको छ, जसमा रेलवे पटरिहरू राखिनेछन्। पश्चिम बंगालको उत्तर दिनाजपुर जिल्लाको तीन माइल हाटदेखि रांगापानीसम्मको क्षेत्रमा यो सुरङ निर्माण गरिनेछ।
पूर्वोत्तर सीमान्त रेलवेका प्रवक्ता कपिंजल किशोर शर्मा अनुसार परियोजना ड्राफ्ट तयार छ, तर यसलाई अझै अन्तिम अनुमोदन प्राप्त भएको छैन। सुरङ निर्माणपछि यो क्षेत्रको यातायात प्रणालीलाई तीव्रता दिने र कनेक्टिविटीमा सुधार ल्याउने लक्ष्य राखिएको छ।
असममा ब्रह्मपुत्र मुनि सुरङ
यस्तो मात्रै होइन, असम राज्यमा ब्रह्मपुत्र नदीको मुनि पनि एक लामो सुरङ निर्माणको तयारी छ। यस सुरङका माध्यमबाट असमलाई अन्य क्षेत्रसँग जोड्ने छ र यातायात सञ्जाललाई थप सुदृढ पार्ने लक्ष्य राखिएको छ।
सम्भावित सुरङ परियोजनाले पूर्वोत्तर भारतका लागि ऐतिहासिक महत्व राख्नेछ, जसले क्षेत्रीय विकास र कनेक्टिविटीमा ठूलो योगदान पुर्याउने विश्वास गरिएको छ।
अर्थ र रणनीतिक महत्त्व
“चिकन नेक” र असमका सुरङ परियोजनाले भारतको रणनीतिक अवस्थिति बलियो बनाउने, सुरक्षा र सैन्य आवाजाहीलाई तिव्र बनाउने लक्ष्य राख्दछन्। यसका साथै, पूर्वोत्तर भारतको आर्थिक र सामाजिक समृद्धिमा महत्वपूर्ण योगदान पुर्याउने आशा गरिएको छ।