त्रिशूर: केरल प्रहरीले सामाजिक सञ्जालमार्फत कथित रूपमा चरमपन्थी विचारधाराको प्रचार–प्रसार गरेको आरोपमा असमका २५ वर्षीय एक युवकलाई पक्राउ गरेको छ। पक्राउ पर्ने व्यक्ति रोशिदुल इस्लाम भएको प्रहरीले जनाएको छ। उनलाई मंगलबार मध्य केरलको त्रिशूर जिल्लास्थित कापामंगलम प्रहरी चौकी क्षेत्रबाट नियन्त्रणमा लिइएको हो।
प्रहरीका अनुसार रोशिदुल विगत करिब दुई वर्षदेखि सो क्षेत्रमा बस्दै आएका थिए र पण्डाल निर्माणसम्बन्धी एक कम्पनीमा काम गर्दै आएका थिए। गोप्य सूचनाका आधारमा प्रहरीले मंगलबार बिहान उनको बसोबास स्थानमा छापा मारी पक्राउ गरेको हो।
प्रारम्भिक अनुसन्धानमा उनले सामाजिक सञ्जालमा धार्मिक घृणा फैलाउने तथा आतंकवादतर्फ झुकाव देखाउने सामग्री साझा गरेको पाइएको प्रहरीको दाबी छ। उनी फोन कल र सामाजिक सञ्जालमार्फत बंगलादेशसहित विदेशमा रहेका केही व्यक्तिसँग सम्पर्कमा रहेको पनि खुलेको छ। अनुसन्धानका क्रममा उनी बंगलादेशमा रहेका आफ्ना काकासँग नियमित सम्पर्कमा रहने र फेसबुक मेसेन्जरमार्फत पाकिस्तानसम्म सम्पर्क विस्तार गरेको तथ्य फेला परेको प्रहरीले जनाएको छ।
प्रहरीले प्रारम्भिक छानबिनका आधारमा रोशिदुलले पाकिस्तानबाट एके–४७ राइफल प्राप्त गर्ने प्रयाससमेत गरेको आरोप लगाएको छ। घटनासँग सम्बन्धित थप अनुसन्धान जारी रहेको र उनका विदेशी सम्पर्कहरूको विस्तृत विवरण संकलन गरिँदै गरेको प्रहरीले जनाएको छ।