नयाँ दिल्ली: युक्रेनी राष्ट्रपति भ्लोदिमिर जेलेन्स्कीले अमेरिका र युक्रेनबीच अर्को हप्ता साउदी अरेवियामा वार्ता हुने बताएका छन्।
जेलेन्स्कीले उक्त बैठक महत्त्वपूर्ण हुने आशा पनि व्यक्त गरेका छन्।
जेलेन्स्की खाडी देशमा हुने भएकोले यी वार्ताहरूमा भाग नलिने जनाएका छन्। उनले युक्रेनले सकेसम्म चाँडो दिगो शान्ति स्थापना गर्ने दिशामा काम गरिरहेको बताए।
अमेरिकी राष्ट्रपति डोनाल्ड ट्रम्पका विशेष दूत स्टिभ विटकफले अमेरिकी टोलीले रुस-युक्रेन युद्ध अन्त्य गर्न शान्तिको लागि “ढाँचा” मा छलफल गर्न चाहेको बताए।
गत शुक्रबार ह्वाइट हाउसमा जेलेन्स्की र ट्रम्पबीच चर्को बहस भएको थियो। जसको क्रममा ट्रम्पले जेलेन्स्की लडाईं अन्त्य गर्न तयार नभएको बताएका थिए।
त्यस विवादपछि अमेरिकाले युक्रेनलाई सैन्य सहयोग बन्द गरेको छ। साथै गोप्य जानकारी युक्रेनलाई दिन पनि बन्द गरेको छ।
युक्रेनी राष्ट्रपतिले उक्त विवादप्रति दु:ख व्यक्त गरेका छन्। उनी हाल देशको सबैभन्दा ठूलो सैन्य आपूर्तिकर्ता अमेरिकासँग सम्बन्ध सुधार गर्ने प्रयास गरिरहेका छन्।
बिहीबार विटकफले ट्रम्पले जेलेन्स्कीबाट “माफी” र “कृतज्ञता” सहितको पत्र प्राप्त गरेको बताए।
रुसले फेब्रुअरी २०२२ मा युक्रेनमा आक्रमण सुरु गरेको थियो। अहिले युक्रेनी भूभागको लगभग २० प्रतिशत रुसी नियन्त्रणमा छ।