गुरुग्राम: समाजवादी पार्टीका वरिष्ठ नेता मुलायम सिंह यादवको अवस्था नाजुक बन्दै गएको छ। सास फेर्न गाह्रो भएपछि गुरुग्रामको मेदान्त अस्पतालको आईसीयू–५ मा सारिएको छ। उनलाई चिकित्सकले भेन्टिलेटरमा राखेका छन्। समाजवादी पार्टीका अध्यक्ष मुलायम सिंह यादव केही दिनदेखि यहाँ उपचार गराइरहेका छन्। उनलाई आईसीयूमा सार्दा भाइ शिवपाल सिंह यादव र छोरा प्रतीक पनि साथमा थिए। सिंहको स्वास्थ्य बिग्रँदै गएपछि डा नरेश त्रेहान, डा सुनिता, डा मनोज र डा अभिषेकले चेकअप गरे।

उता, उत्तर प्रदेशका पूर्व मुख्यमन्त्री अखिलेश यादव र मुलायम सिंह यादवकी बुहारी डिम्पल यादव पनि बाबुको गम्भीर अवस्थाको जानकारी पाएलगत्तै मेदान्त पुगेका छन्। सिंहको स्वास्थ्य लामो समयदेखि बिग्रँदै गएको बताइएको छ। उनका परिवारले तीन महिनाअघि उनलाई यही अस्पतालमा ल्याएका थिए। यहाँ पूर्ण चेकअपपछि उनलाई निजी अस्पतालमा भर्ना गरिएको थियोl आइतबार बिहानसम्म सबै ठीकठाक थियो तर दिउँसो उनलाई अचानक सास फेर्न समस्या हुन थाल्यो। उनको अवस्था गम्भीर देखेपछि चिकित्सकले उनलाई तत्कालै आईसीयू–५ मा सारेका थिए। डाक्टरका अनुसार सिंहको रक्तचाप र अक्सिजन पहिले नै कम थियो। मेदान्त अस्पताल व्यवस्थापनले उनको अवस्थाबारे साँझ ७:३० बजे मेडिकल बुलेटिन जारी गर्नेछ। यसमा उनको स्वास्थ्यको बारेमा पूर्ण जानकारी दिइनेछ। उल्लेखनीय छ, मुलायम सिंह यादवको जन्म २२ नोभेम्बर १९३९ मा इटावाको सैफई गाउँमा भएको थियो। उनका बुबा सुगरसिंह यादव र आमा मूर्ति देवी खेतीपाती गर्थिन्।