काठमाडौं: स्विट्जरल्याण्डमा रहेको वायु गुणस्तर अनुगमन डाटाबेस आईक्यूएयरले मंगलबार आफ्नो ‘विश्व वायु गुणस्तर प्रतिवेदन २०२४’ सार्वजनिक गरेको छ, जसमा विश्वका अधिकांश जनसंख्याले प्रदूषित हावामा सास फेरिरहेको निष्कर्ष निकालेको छ।
१ सय ३८ देशका ४० हजार वायु गुणस्तर अनुगमन केन्द्रबाट सङ्कलन गरिएको तथ्यांकमा आधारित रहेको प्रतिवेदनमा चाड, बंगलादेश, पाकिस्तान, कङ्गो र भारत विश्वका पाँच सबैभन्दा प्रदूषित देश हुन्।
प्रतिवेदनमा नेपाल विश्वको सातौं प्रदूषित देशको सूचीमा परेको छ। प्रतिवेदनमा विश्व स्वास्थ्य संगठनले तोकेको वार्षिक औसत मापदण्डभन्दा ८.० गुणा बढी प्रदूषित हावा रहेको उल्लेख छ।
आज पनि नेपाल विश्वको दोस्रो प्रदूषित देशको सूचीमा छ। भारत पहिलो स्थानमा छ।
ओशिनिया सबैभन्दा सफा क्षेत्र हो।
अष्ट्रेलिया, बहामास, बार्बाडोस, इस्टोनिया, ग्रेनाडा, आइसल्याण्ड र न्यूजील्याण्ड मात्र विश्व स्वास्थ्य संगठन द्वारा निर्धारित वार्षिक औसत पीएम २.५ मापदण्डहरू पूरा गर्ने देशहरू हुन्।
यसैबीच, ओशिनियालाई पृथ्वीको सबैभन्दा सफा क्षेत्र घोषित गरिएको छ, यसका ५७ प्रतिशत सहरहरू वायुको गुणस्तर मापदण्ड पूरा गरेका छन्।
भारतका सहरहरू प्रदूषणबाट सबैभन्दा बढी प्रभावित छन्
प्रतिवेदनका अनुसार विश्वका २० सबैभन्दा प्रदूषित सहरमध्ये १३ भारतमा छन्।
उत्तरपूर्वी भारतको एउटा सानो औद्योगिक सहर बर्निहाटलाई विश्वको सबैभन्दा प्रदूषित महानगरीय क्षेत्रको रूपमा पहिचान गरिएको छ।
त्यस्तै, दिल्ली विश्वको सबैभन्दा प्रदूषित राजधानी रहेको छ।