मस्को: रूसको साइबेरियन पर्माफ्रोस्टमा सन् २०२० मा पूर्ण रूपमा संरक्षित ममीफाइड भालु फेला परेको थियो। तर अहिले यसको बारेमा नयाँ खुलासा भएको छ। वैज्ञानिकहरूले यो पुरानो अनुमान भन्दा धेरै जवान र फरक प्रजातिको भएको पत्ता लगाएका छन्। यो पूर्वी साइबेरियन सागरको दुर्गम रुसी टापु बोलशोय ल्याखोभस्कीमा रेनडियर गोठालाहरूले पत्ता लगाएका थिए। जब उनीहरूले यो भालु फेला पारे, यसको छाला, फर, दाँत, नाक, शरीरको बोसो र भित्री अंगहरू पूर्ण रूपमा सुरक्षित थिए। यो देख्दा पहिलो नजरमा भालु जिउँदै छ जस्तो लाग्छ। अन्वेषकहरूले यो भालुलाई बोल्सोय इथरिकन नदीको नामबाट इथरिकन भालु राखेका छन्।

यस भालुको अवशेषहरू याकुत्स्कको उत्तर-पूर्वी संघीय विश्वविद्यालय (एनईएफयु)मा विश्लेषण गरिएको थियो। जब यो भालु पहिलो पटक फेला परेको थियो, यो एक विलुप्त ‘गुफा भालु’ हो भन्ने विश्वास गरिएको थियो। गुफा भालु एक पुरानो हराएको प्रजाति हो जुन लगभग ११ फिट अग्लो हुन्थ्यो। तिनीहरूको वजन लगभग १५ सय किलोग्राम थियो र लगभग २२ हजार वर्ष पहिले विलुप्त भयो। यो भालुको यो ममी २२ हजार वर्ष भन्दा पुरानो हुनेछ भन्ने विश्वास गरिएको थियो। तर हालैका अध्ययनहरूले देखाएको छ कि यो लगभग ३५ सय वर्ष पुरानो हो।

युनिभर्सिटीले जारी गरेको विज्ञप्तिमा भनिएको छ, ‘खैरो भालुको जीवाश्म उत्तर–पूर्वी फेडरल युनिभर्सिटीका अन्वेषकहरू र अन्य रुसका अनुसन्धानकर्ताहरूले अनुसन्धान गरेका थिए। आनुवंशिक अध्ययनहरूले यसको उत्तरपूर्वमा खैरो भालुको विकास प्रकट गरेको छ। हालको आनुवंशिक अध्ययन र रेडियोकार्बन डेटिङ भइसकेको छ, जसअनुसार यसको उमेर ३,४६० वर्ष छ। यो एक महिला भालु हो। यसको लम्बाइ १.५५ मिटर र वजन ७८ किलो छl’

एनईएफयु टोलीले भालुको शवको जाँच गर्‍यो, जसले यस रहस्यमय ममीको बारेमा धेरै कुराहरू खुलासा गर्‍यो। परीक्षणले मृत्युको समयमा २-३ वर्षको हुनुपर्छ भन्ने कुरा पत्ता लगायो। भालुको मृत्यु कसरी भयो भन्ने स्पष्ट छैन, तर यसको ममीले यसको मेरुदण्डको हड्डीमा चोटपटक देखाएको छ, जुन यसको मृत्युको कारण हुनसक्छ। भालु यति राम्रोसँग संरक्षित थियो, यसको अन्तिम खाना आंशिक रूपमा अक्षुण्ण थियो। भालुले धेरै बोटबिरुवा र चराहरू खाएको र जसका प्वाँखहरू पेट भित्र रहेको पत्ता।