३० नोभेम्बरः भारतीय गोर्खा प्रजातान्त्रिक मोर्चा, कालीझोड़ा शाखाको तत्त्वावधानमा आयोजित गोपाल प्रधान स्मृति विनर ट्रफी अनि शहीद उत्तम प्रधान स्मृति रनर अप् ट्रफी ओपन नक्आउट फूटबल टुर्नामेण्टमा सिलगढ़ीको मारामार एफसी-ले प्री-क्वार्टर फाइनलमा स्थान बनायो। कालीझोड़ा फूटबल मैदानमा बुधवार भएको म्याचमा मारामार एफसी-ले कालीझोड़ा युवा परिवारलाई ४-३-ले पराजित गऱ्यो। विजेता टीमबाट अभिषेकले 2२ गोल गरे। यसबाहेक लरेन्स र स्माइलले १-१ गोल गरे। यसरी नै कालीझोड़ा युवा परिवारबाट रुपक तामाङ, सत्या छेत्री र रुपम प्रधानले गोल गरे। बिहीवार खेलिने म्याचमा जरायोटार (पन्बु) र सेलेसियन कलेज सिलगढ़ीबीच भिड़न्त हुनेछ। यस टुर्नामेण्टमा जम्मा २८ वटा टीमलाई स्थान दिइएको छ। दुईवटा सेमिफाइनल २७ र २८ दिसम्बरमा हुनेछ। यसरी नै फाइनल ३१ दिसम्बरमा खेलिनेछ। यस सेभेन ए साइड फूटबल टुर्नामेण्टमा च्याम्पियन हुने टीमलाई आकर्षक विनर ट्रफीको साथमा १ लाख रुपियाँको नगद पुरस्कार प्रदान गरिनेछ। यसरी नै रनरअप् हुने टीमलाई आकर्षक विनर ट्रफीको साथमा ५० हजार रुपियाँको नगद पुरस्कार प्रदान गरिनेछ। यसको साथमा एकाधिक आकर्षक व्यक्तिगत नगद पुरस्कार र ट्रफीहरू पनि रहनेछ।