चीन: चिनियाँ राष्ट्रपति सी जिनपिङलाई घरमै नजरबन्द गरिएको बारे सामाजिक सञ्जालमा अफवाहहरू तीव्र गतिमा फैलिरहेका छन्। चीनको तर्फबाट सांघाई कोअपरेशन अर्गनाइजेसनमा सहभागी हुन तास्कन्द गएपछि उनलाई सेना प्रमुखको पदबाट हटाइएको दाबी गरिएको छ। तर, यो दाबी अहिलेसम्म पुष्टि भएको छैन। सामाजिक सञ्जाल ट्विटरमा जिनपिङको ह्यासट्यागमा हजारौं ट्विटहरू भइरहेका छन्। भाजपा नेता तथा राज्यसभा सांसद सुब्रमण्यम स्वामीको ट्वीटपछि यो प्रश्न तीब्र गतिमा उठिरहेको छ। यद्यपि उनले अर्को ट्विटमा सी जिनपिङ बेइजिङमा घरमै नजरबन्दमा रहेको अफवाहको छानबिन गर्नुपर्ने लेखेका छन्। सुब्रमण्यम स्वामीले ट्वीट गर्दै भनेका छन्, ‘चीनबारे नयाँ अफवाह आएको छ, जसको छानबिन गरिनेछ। के सी जिनपिङ घरमै नजरबन्दमा छन्? जिनपिङ हालै समरकन्दमा हुँदा चिनियाँ कम्युनिष्ट पार्टीका नेताहरूले उनलाई सेना प्रमुखको पदबाट हटाएको मानिन्छ। त्यसपछि उनी घरमै नजरबन्द भएको हल्ला चलेको छ। यो ट्विटसँगै उनले एउटा भिडियो पनि सेयर गरेका छन्।

चीनका केही सामाजिक सञ्जाल प्रयोगकर्ताहरूले जिनपिङलाई घरमै नजरबन्दमा राखिएको दाबी गरेका छन्। यसबाहेक चीनको पिपुल्स लिबरेसन आर्मी (पीएलए) ले सी जिनपिङलाई राष्ट्रपति पदबाट हटाएर सत्ता आफ्नै हातमा लिएको दाबी पनि भइरहेको छ। अहिले चिनियाँ राष्ट्रपति ली छ्याओमिङ चीनको नयाँ राष्ट्रपति बनेको बताइएको छ। हालसम्म यस्तो समाचारको आधिकारिक पुष्टि भने भएको छैन। इन्टरनेशनल डेस्कका पत्रकारहरु यस्ता कुराहरु चर्चा मात्रै हुने विश्वास गर्छन्। चीनमा समाचार दिने ग्लोबल टाइम्स, सीएनएन वा बीबीसी जस्ता च्यानलहरूले पनि यसको पुष्टि गरेका छैनन्। यस्तो अवस्थामा अहिलेसम्मको सत्यता के हो भने सी जिनपिङलाई न घरमै नजरबन्द गरिएको छ न त चीनमा कुनै विद्रोह नै भएको छ।

वास्तवमा, यस हप्ता चीनमा, दुई पूर्व मन्त्रीहरूलाई मृत्युदण्ड र चार अधिकारीहरूलाई आजीवन कारावासको सजाय सुनाइएको थियो। उनीहरु ‘राजनीतिक गुट’ को हिस्सा भएको बताइएको छ। अहिले कम्युनिष्ट पार्टीको भ्रष्टाचार विरोधी अभियान चलिरहेको छ। यी अधिकारी र पूर्व मन्त्रीहरू जिनपिङका विरोधी थिए भन्ने विश्वास गरिन्छ। यो अफवाह जिनपिङ विरोधी क्याम्पले फैलाएको मानिन्छ। हालै चिनियाँ राष्ट्रपति सी जिनपिङ २२औँ शाङ्घाई सहयोग संगठनमा सहभागी हुन उज्वेकिस्तानको तास्कन्द पुगेका थिए। एससीओ बैठकमा भारतीय प्रधानमन्त्री नरेन्द्र मोदी र रुसी राष्ट्रपति भ्लादिमिर पुटिन पनि सहभागी थिए। यस बैठकमा भारतलाई आउँदो २३औं एससीओको आयोजनाको जिम्मा दिइएको छ। यसका लागि चिनियाँ राष्ट्रपति जिनपिङ र रुसी राष्ट्रपति पुटिनले पनि भारतलाई बधाई दिएका छन्।